በመዲናዋ የሚኒባስና የሀይገር ባስ የትራንስፖርት የታሪፍ ማሻሻያ ተደረገ

የአዲስ አበባ ከተማ አስተዳደር የትራንስፖርት ባለስልጣን አዲስ የኪሎ ሜትር ልኬት በማድረግ በሚኒ ባስ እና የሃይገር የህዝብ ትራንስፖርት አገልግሎት ሰጭዎች ላይ የታሪፍ ማሻሻያ ማድረጉን አስታወቀ።

ማሻሻያው የከተማ ትራንስፖርት በሚሰጡ መደበኛ ታክሲዎች (ሚኒባሶች) እና የሃይገር ባሶች የትራንስፖርት ክፍያ ላይ የተደረገ መሆኑንም ባለስልጣኑ አስታውቋል።

ባለስልጣኑ ማሻሻያው በአገልግሎት ሰጭ እና ተገልጋዩ የሚነሱ ቅሬታዎችን ለመፍታትና ያለውን የትራንስፖርት ፍላጎትና አቅርቦት ለማጣጣም የተደረገ መሆኑንም ገልጿል።

ከ2003 ዓ.ም ጀምሮ እስካሁን ማሻሻያ አለመደረጉና የከተማው እየሰፋ መምጣት ለማሻሻያው ምክንያት መሆናቸውን የባለስልጣኑ ዋና ስራ አስኪያጅ አቶ ምትኩ አስማረ ተናግረዋል።

ከዚህ ባለፈም አስተዳደራዊ እንዲሁም ለመኪና እቃ መለዋወጫ የሚወጡ እና ሌሎች ልዩ ልዩ ወጪዎችን ታሳቢ ባደረገ መልኩ ማሻሻያው መደረጉንም ነው የተናገሩት።

ማሻሻያው ከዚህ ቀደም ከታሪፍ በላይ ከፍለናል በሚል ለሚነሱ ቅሬታዎች መልስ መስጠት በሚችል መልኩ መዘጋጀቱንም ገልጸዋል።

በአዲሱ ማሻሻያ መሰረት በየ 2 ነጥብ 5 ኪሎ ሜትሩ 1 ብር ከ50 ሳንቲም የሚከፈል ይሆናል።

ለሚኒባስ ከመነሻ እስከ 2 ነጥብ 5 ኪሎ ሜትር 1 ብር ከ50፣ ከ2 ነጥብ 6 እስከ 5 ኪሎ ሜትር 3 ብር፣ ከ5 ነጥብ 1 እስከ 7 ነጥብ 5 ኪሎ ሜትር 4 ብር ከ50 ሳንቲም፣ ከ7 ነጥብ 6 እስከ 10 ኪሎ ሜትር 6 ብር፣ ከ10 ነጥብ 1 እስከ 12 ነጥብ 5 ኪሎ ሜትር 7 ብር ከ50 ሳንቲም ያስከፍላል።

ከ12 ነጥብ 6 እስከ 15 ኪሎ ሜትር 9 ብር፣ ከ15 ነጥብ 1 እስከ 17 ነጥበ 5 ኪሎ ሜትር 10 ብር ከ50 ሳንቲም፣ ከ17 ነጥብ 6 እስከ 20 ኪሎ ሜትር 12 ብር፣ ከ20 ነጥብ 1 እስከ 22 ነጥብ 5 ኪሎ ሜትር 13 ብር ከ50 ሳንቲም፣ ከ22 ነጥብ 6 እስከ 25 ኪሎ ሜትር 15 ብር፣ ከ25 ነጥብ 1 እስከ 27 ነጥብ 5 ኪሎ ሜትር 16 ከ50 ሳንቲም እንዲሁም ከ27 ነጥብ 6 እስከ 30 ኪሎ ሜትር ድረስ 18 ብር ሆኗል።

የሃይገር የትራንስፖርት ታሪፍ ደግሞ እስከ 8 ኪሎ ሜትር 2 ብር ከ50 ሳንቲም፣ ከ8 ነጥብ 1 እስከ 12 ኪሎ ሜትር 3 ብር ከ50 ሳንቲም፣ ከ12 ነጥብ 1 እስከ 16 ኪሎ ሜትር 4 ብር ከ75 ሳንቲም፣ ከ16 ነጥብ 1 እስከ 20 ኪሎ ሜትር 6 ብር፣ ከ20 ነጥብ 1 እስከ 24 ኪሎ ሜትር 7 ብር እንዲሁም ከ24 ነጥብ 1 እስከ 28 ኪሎ ሜትር 8 ብር ከ25 ሳንቲም እንዲሆን ተወስኗል።

አሁን የተደረገው ማሻሻያ ከሚኒባስና ከሃይገር ውጭ ያሉትን የብዙሃን ትራንስፖርት ድርጅቶችን አይመለከትም።

ማሻሻያው ከፊታችን ዓርብ ግንቦት 24 ቀን 2010 ዓ.ም ጀምሮ ተግባራዊ እንደሚደረግም ባለስልጣኑ አስታውቋል።

 

በሃብታሙ ተክለስላሴ – ኤፍ ቢ ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram