በሕገወጥ መንገድ ገንዘብ ያከማቹ ግለሰቦችና ቡድኖች

መረጃ አዘል ጥያቄ  | በሕገወጥ መንገድ ገንዘብ ያከማቹ ግለሰቦችና ቡድኖች

ጠ/ሚኒስትር አብይ አሕመድ በቤታቸው ውስጥ ገንዘብ ያከማቹ ግለሰቦች ገንዘቡን ወደባንክ እንዲያስገቡ፣ ካልሆነም በቅርቡ እርምጃ እንደሚወሰድ ማስጠንቀቃቸውን ተከትሎ የኢትዮጵያ ሕጋዊ መገበያያ ገንዘብ በቅርቡ ሊለወጥ እንደሚችል አንዳንድ ፍንጮች እየተሰሙ ነው፡፡

በእርግጥም ይህ መረጃ በይፋዊ መንገድ ማረጋገጫ የተገኘለት አለመሆኑ እንደተጠበቀ ሆኖ በሕገወጥ መንገድ ገንዘብ ያከማቹ ግለሰቦችና ቡድኖችን ወደሕጋዊ መስመር ለማምጣት በአንዳንድ ወገኖች የሚነሳው የገንዘብ ኖት የመቀየር ሃሳብ እንዴት ያዩታል? (በጨዋ ደንብ ለሚሰጡን ሃሳብ አስቀድመን እናመሰግናለን)

ጠ/ሚ ዶክተር ዐብይ የውጭ ምንዛሪ በእጃቸው የያዙ አካላት ወደ ባንክ ገቢ እንዲያደርጉ አሳሰቡ

የኢፌዴሪ ጠቅላይ ሚኒስትር ዶክተር ዐብይ አህመድ የውጭ ምንዛሪ በእጃቸው የያዙ አካላት በፍጥነት ወደ ባንክ ገቢ እንዲያደርጉ አሳሰቡ።

ጠቅላይ ሚኒስትሩ ዛሬ የኤርትራውን ፕሬዚዳንት ኢሳያስ አፈወርቂን ጉብኝት አስመልክቶ በሰጡት መግለጫ፥ የውጭ ምንዛሪ ከውጭ ሃገር ወደ ሃገር ውስጥ እየገባ በመሆኑ ምንዛሪ ያከማቹ አካላት ገቢ እንዲያደርጉ አሳስበዋል።

የውጭ ምንዛሪውን ያከማቹ አካላት ችግር ከመከሰቱ በፊት ገቢ በማድረግ ከኪሳራ እንዲድኑም ጥሪያቸውን አቅርበዋል።

በቅርቡም የውጭ ምንዛሪ ህገ ወጥ ዝውውርና ክምችትን ለመከላከል ሃገር አቀፍ ዘመቻ እንደሚደረግም ተናግረዋል።

ይህ ከመሆኑ በፊትና የተረጋጋ ኢኮኖሚ ለመፍጠር የሚደረገውን ጥረት ለማገዝ ሲባልም እነዚህ አካላት በእጃቸው ያለውን ምንዛሪ ወደ ባንክ በመሄድ እንዲመነዝሩም ነው ያሳሰቡት።

የግልና የመንግስት ባንኮችም ይህን ለማድረግ የሚመጡ አካላትን ያልምንም ውጣ ውረድ እንዲያስተናግዱም መልዕክታቸውን አስተላልፈዋል።

ጠቅላይ ሚኒስትሩ በመግለጫቸው ዛሬም በአንዳንድ አካባቢዎች ግጭቶች እየተከሰቱ መሆኑን ጠቅሰው፥ በዚህም የዜጎች ህይዎት መጥፋትና መፈናቀል እየተከሰተ መሆኑንም ነው የተናገሩት።

ከዚህ አንጻርም ህዝብን ከህዝብ የሚያጋጩ አካላት እንዲሁም በጉዳዩ በቀጥታ ባይሆንም በተዘዋዋሪ ተሳታፊ የሆኑ አካላት ከድርጊታቸው ሊታቀቡ ይገባል ብለዋል።

እነዚህ አካላት ከጥፋት ድርጊት በመታቀብም ህዝብና ህዝብን የሚያቀራርቡና የሚያፋቅሩ ጉዳዮች ላይ ትኩረት ሊያደርጉ ይገባልም ነው ያሉት ጠቅላይ ሚኒስትሩ በመግለጫቸው።

ጊዜ ያለፈበትን አካሄድ በመተውም ለህዝብና ለሃገር አንድነት የሚከፈልን ዋጋ ለመክፈል መዘጋጀት እንደሚኖርባቸውም ገልጸዋል።

ጠቅላይ ሚኒስትሩ እነዚህ አካላት ስሜታቸውን አሸንፈው ለሰላም መስራት እንዳለባቸው ጠቅሰው፥ ህዝብና ህዝብን ለማቀራረብ መስራት ይገባቸዋልም ነው ያሉት።

የኢትዮጵያ ሶማሌና ኦሮሚያ ክልል አመራሮችም እርስ በርስ በመወያየት ህዝብን የማቀራረብ ስራ እንዲሰሩም ጥሪያቸውን አቅርበዋል።

የመከላከያ ሰራዊትን ጨምሮ የፌደራል ፖሊስና ሌሎች የፀጥታ መዋቅር አካላትም፥ መሰል ድርጊቶችን እልባት ለመስጠት ሃገራዊ ሃላፊነታቸውን እንዲወጡም አሳስበዋል።

ግጭትን ለማስቆም በሚደረግ ሂደት ወቅትም ህገ መንግስቱን በሚጻረር መልኩ በሰው ህይዎትም ሆነ ንብረት ላይ ጉዳት ሊደርስ እንደማይገባም አጽንኦት ሰጥተዋል።

ይህን መሰሉ ህዝብን ከህዝብ የማጋጨት ድርጊቱ እንዳይሰፋም ሁሉም ኢትዮጵያዊ የበኩሉን ሊወጣ እንደሚገባም አስረድተዋል።

የተጀመረውን ሃገራዊ የለውጥ ጉዞ ለማደናቀፍ የሚጥሩ አካላትን ድርጊትና ተግባር በመዋጋት ሂደት ውስጥም ሁሉም የበኩሉን እንዲወጣም መልዕክታቸውን አስተላልፈዋል።

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram