በህገ ወጥ መንገድ ሲዘዋወር የነበረ 1 መትረየስና 20 ሽጉጦች በሰሜን ሸዋ ዞን ደብረ ሊባኖስ ቁጥጥር ስር ዋሉ

በኦሮሚያ ክልል ሰሜን ሸዋ ዞን ደብረ ሊባኖስ ወረዳ በህገ ወጥ መንገድ ሲዘዋወሩ የነበሩ የተለያዩ የጦር መሳሪያዎች በቁጥጥር ስር መዋላቸው ተገለፀ።

የደብረ ሊባኖስ ወረዳ የመንግስት ኮሙዩኒኬሽን ጉዳዮች ጽህፈት ቤት እንዳስታወቀው፥ ህገ ወጥ የጦር መሳሪያዎቹ ከደብረ ማርቆስ ከተማ በመነሳት ወደ አዲስ አበባ በመጓጓዝ ላይ እያሉ ነው በቁጥጥር ስር የዋሉት።

የጦር መሳሪያዎቹ በቁጥጥር ስር ሊውሉ የቻሉትም ህብረተሰቡ የሰጠውን ጥቆማ ተከትሎ ፖሊስ ባደረገው ፍተሻ መሆኑንም ጽህፈት ቤቱ አስታውቋል።

በተደረገው ፍተሻ በቁጥጥር ስር ሊውሉ የቻሉት ህገ ወጥ የጦር መሳሪያዎችም አንድ መትረየስ እና 20 ሽጉጦች መሆናቸውንም ገልጿል።

illegal_2.jpg

ህገ ወጥ የጦር መሳሪያዎቹ ኮድ 2 አዲስ አበባ በሆነች የቤት ተሽከርካሪ ተጭነው ወደ አዲስ አበባ ሊገቡ ሲሉ መያዛቸውንም ጽህፈት ቤቱ አስታውቋል።

በትናንትናው እለትም በተመሳሳይ በህገ ወጥ መንገድ ሲዘዋወሩ የነበሩ 53 ሽጉጦች በኦሮሚያ ክልል ሰሜን ሸዋ ዞን በቁጥጥር ስር መዋላቸው ይታወሳል።

የጦር መሳሪያዎቹ በአይሱዙ የጭነት ተሽከርካሪ ተጭነው ከአዲስ አበባ በመነሳት ወደ ሰሜን የሀገሪቱ ክፍል በመጓጓዝ ላይ እያሉ ከህብረተሰቡ በደረሰ ጥቆማና ፖሊስ ባደረገው ድንገተኛ ፍተሻ በቁጥጥር ስር መዋላቸውም ተነግሯል።

Share your thoughts on this post

%d bloggers like this:
Visit Us On TwitterVisit Us On YoutubeVisit Us On Instagram