በሃዋሳው ግጭት በአሰቃቂ ሁኔታ ህይወት ሲያጠፉ በማህብራዊ ሚዲያ ላይ የታዩት ሁለቱ ወንድና ሴት ተጠርጣሪዎች በቁጥጥር ስር ዋሉ

በቅርቡ በደቡብ ክልል ሀዋሳ አካባቢ ተከስቶ በነበረው ግጭት ወቅት የንፁሃንን ህይወት በአሰቃቂ ሁኔታ ያጠፉ እና ማንነታቸው በማህብራዊ ሚዲያ የተሰራጨው ተጠርጣሪዎች በቁጥጥር ስር ዋሉ።

በግጭቱ ወቅት አንድ ወጣት አትግደሉኝ እያለ ድብደባ ሲፈፅሙ እና በግጭቱ ህይወት ባለፈ ሰው ላይ አስነዋሪ ድርጊት በአንድ ሴት ሲፈፀም የሚያሳዩ ቪዲዮዎች ሰሞኑን በማህብራዊ ሚዲያዎች በርካቶች እንደተቀባበሏቸው ይታወሳል።

የደቡብ ክልል ፖሊስ ኮሚሽን ለፋና ብሮድካስቲንግ ኮርፖሬት እንደገለፀው የሰው ህይወት በማጥፋት የተጠረጠሩት እነዚህ ወንድ እና ሴት ተጠርጣሪዎች በሃዋሳ ከተማ በቁጥጥር ስር ውለዋል።

በኮሚሽኑ የታክቲክ ምርመራ ዳይሮክቶሬት ዳይሬክተር ምክትል ኮማንደር አዲሴ አውኖ እንደገለፁት፥ በፌስቡክ መረጃዎችን በማየት በተደረገ ምርመራ ተደብቀው ከነበሩበት መያዛቸውን ገልጸዋል።

ከተያዙት ጋር አብረው የነበሩ ግለሰቦችንም በቁጥጥር ስር ለማዋል ከፍተኛ ጥረት በመደረግ ላይ እንደሆነም ነው የተናገሩት።

የተያዙት ሁለቱ ግለሰቦችም ወንጀል መፈፀማቸውን ያመኑ መሆናቸውን በመግለፅ ህዝቡ እያደረገ የሚገኘው ወንጀለኞችን የማጋለጡን ተግባር ተጠናክሮ ሊቀጥል ይገባል ብለዋል።

የተዘረፉ ንብረቶችን የማስመለሱ ተግባርም እየተከናወነ ሲሆን፥ በእስካሁኑ ጥረት በአራት ተሽከርካሪዎች የተዘረፉ እቃዎችን ማስመለስ እንደተቻለ ተናግረዋል።

በቀጣይም ንብረት የማስመለስና ወንጀሎችን ለህግ የማቅረቡ ተግባር ይቀጥላል ብለዋል።

በብርሃኑ በጋሻው – ኤፍቢሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram