ቅዠት ከጤናችን ጋር ግንኙነት ይኖረው ይሆን?

የአብዛኞቻችን ቅዠት ከአደጋ ጋር የተገናኙ ሲሆኑ፥ ምናልባት አንዳንዶቻችን አንድ ግለሰብ መሳሪያ አንግቶ ሊገለን ሲያባርርን እኛም ስንሯሯጥ በላብ ተዘፍቀን አዳራችንን ልናሳልፍ እንችላለን፡፡

እንዲሁም እንደየሀገሩ እና እንደየባህሉ ሰዎች በየዕለቱ የሚገጥሟቸው ዋና ዋና ተብለው የተለዩ ቅዠቶች ይኖራሉ፡፡

በካናዳ ሞንትሪያል የህልምና የቅዠት ትምህርት ክፍል ታዲያ ይህ ቅዠት የሚባለው ነገር ከጤናችን ጋር ግንኙት ይኖረው ይሆን የሚለውን ነገር ለመለየት ጥናት አካሂዷል፡፡

ብዙ ጊዜ መጥፎ ቅዠት የሚያጋጥም ከሆነ በተለይም በየዕለቱ አንድ ጊዜ የሚከሰት ከሆነ ጭንቀት እና የእንቅልፍ ማጣት ሊፈጥርብን ይችላል፡፡

አንዳንዶችም መጥፎ የሚባሉ ቅዠቶችን እንቅልፎቻቸው ላይ ላለማስተናገድ አይተኙም ተብሏል፡፡

ይህ ደግሞ ሌላ መዘዝ ይዞ ይመጣል እንደምሳሌ ከተነሱት መካከልም የአዕምሮ ጤና መቃወስ፣ ብርታት ማጣት፣ ከፍተኛ ድብርት መሰማት እና ለልብ ህመም ይዳርጋል፡፡

እንዲሁም ከዚህ ከፍ ሲልም እራስን የማጥፋት ሀሳብ ውስጥ ሊከተን እነደሚችልም ሌሎች ጥናቶች ጠቁመዋል፡፡

አጥኚዎች የስነልቦና ልሂቁን ሲግመን ፍሮይድን በመጥቀስ ቅዠቶቻችን የቀን ውሏችን ነጸብራቆች ናቸው ይላሉ፡፡

በዚህም ቅዠት ሁሉ መጥፎ ያለመሆኑን ገልጸው ቀሪ የህይወት ውሏችንን እንድናስተካክል ጭንቀትን እንድናስወግድ ይረዳናል ብለዋል፡፡

ህክምናውን የሚሰጡ አካላት ግለሰቦች በተደጋጋሚ ከሚያቃዣቸው ነገር ጋር ፊት ለፊት ማገናኘትን አንደኛው ምርጫ ነው ይላሉ፡፡

ለምሳሌ ውሻ በተደጋጋሚ ቅዠቱ ውስጥ የሚከሰት ከሆነና እንቅልፍ ከነሳው በእውን ደግሞ ውሻን እንዲለማመደው ማድረግ ነው ይላሉ፡፡

ሆኖም ይህ በአንጻሩ ሁልጊዜም መፍትሔ አይሆንም ይላሉ፤ ይልቅ የግለሰቡ ፍርሃት ይበልጥ ሊጨምርም ይችላል ብለዋል፡፡

በመጨረሻም በመደበኛ ሁኔታ ቅዠት የሚያስቸግሮት ከሆነ ባለሙያዎቹ ሁለት መፍትሔዎችን ጠቁመዋል፡፡

የመጀመሪያው ሐኪም በማማከር ጭንቀትና ውጥረት በሚያጋጥም ወቅት የደም ስርጭታችንን የሚያረጋጉ መድሐኒቶችን መውሰድ ሲሆን፥ ሁለተኛው ደግሞ በየዕለቱ የሚካሄድ በምስል የታገዘ ልምምድ መፍትሔ ሊሆኑ ይችላሉ ብለዋል፡፡

 

 

ምንጭ፦ታይም
በአብርሃም ፈቀደ ወደ አማርኛ ተመለሰ

Share your thoughts on this post