ቀዳማዊት እመቤት ወ/ሮ ዝናሽ የትምህርት ቤት ምገባ ፕሮግራምን በትምህርት ቤቶች ተገኝተው ጎበኙ

የኢፌድሪ ቀዳማዊት እመቤት ወይዘሮ ዝናሽ ታያቸው የትምህርት ቤት ምገባ ፕሮግራምን በተወሰኑ ትምህርት ቤቶች ተዘዋውረው ጎብኝተዋል።

ለተማሪዎች ምቹ የትምህርት ሁኔታና አካባቢ እንዲኖር፥ ለትምህርት ያላቸውን ፍላጐትና ተነሳሽነት እንዲጨምርና የትምህርት አቀባበላቸውም እንዲሻሻል ለማድረግ የትምህርት ቤት ምገባ ፕሮግራም ተግባራዊ እየተደረገ መሆኑ ይታወቃል።

በዛሬው እለትም ቀዳማዊት እመቤት ወይዘሮ ዝናሽ ታያቸው በተለያዩ ትምህር ቤቶች በመዘዋወር የህጻናት ተማሪዎች የምገባ ፕሮግራም መጎብኘታቸውን ከቀዳማዊት እመቤት የጽህፈት ቤት ያገኘነው መረጃ ያመለክታል።

ቀዳማዊት እመቤት ወይዘሮ ዝናሽ ታያቸው የጽህፈት ቤታቸውን ቀጣይ የትኩረት አቅጣጫዎች ይፋ ባደረጉበት ወቅት እድሜያቸው ለትምህርት የደረሰ ህጻናት ሁሉ መማር እንዲችሉና ውጤታማ እንዳይሆኑ ማነቆ የሚሆኑባቸውን ችግሮች በመለየት እንደሚሰሩ መግለፃቸው ይታወሳል።

ወይዘሮ ዝናሽ በተለይም በህጻናት እና ሴቶች ደህንነት ዙርያ ትኩረት በማድረግ በህጻናት ላይ የሚታየውን የተመጣጠነ ምግብ እጥረት እንዲሁም ያለእድሜ ጋብቻ፣ ጠለፋ፣ ተገዶ መደፈር እና የሴት ልጅ ግርዛትን ከሚመለከታቸው አካላት ጋር በጋራ በመሆን ለመከላከል በቁርጠኝነት እንደሚሰሩም በትኩረት አቅጣጫዎቻቸው ተገልጿል።

ቀዳማዊት እመቤት ወይዘሮ ዝናሽ በዛሬው እለት በትምህረት ቤቶች ተገኝተው ያደረጉት ጉብኝትም የዚሁ አካል ነው። ኤፍ.ቢ.ሲ

Share your thoughts on this post