ሽብርተኝነትና ፅንፈኝነትን ለመከላከል ኢትዮጵያ ከሶማሊያ ጋር እንደምትሰራ ጠ/ሚኒስትር ዶ/ር አብይ አህመድ ገለፁ

በኢትዮጵያና ሶማሊያ ድንበር እንዲሁም በአፍሪካ ቀንድ ሰላምና ደህንነትን ለማረጋገጥ ሽብርተሽኝነትን እና ፅንፈኝነትን ለመከላከል ሀገራቱ በጋራ እንደሚሰሩ ጠቅላይ ሚኒስትር ዶክተር አብይ አህመድ ገለፁ።

ጠቅላይ ሚኒስትሩ በሶማሊያ ዛሬ ጉብኝት አድርገዋል።

በጉብኝታቸው ወቅትም ከሶማሊያው ፕሬዚዳንት ሙሀመድ አብዱላሂ ሙሀመድ ጋር በሁለትዮሽና በአከባቢያዎ ሰላምና ፀጥታ ጉዳዮች ዙሪያ ተወያይተዋል።

ከውይይታቸው በኋላ በጋራ በሰጡት ጋዜጣዊ መግለጫ ላይ እንደገለፁት በአካባቢው የሚስተዋሉተን ግጭቶች፣ የኢንቨስትመንት እጥረት እና ድህነት ለመቅረፍ ሀገራቱ በጋር ይሰራሉ ብለዋል።

በሁለቱ ሀገራት ምርታማነትን፣ ፈጠራን እና የግል ኢንተርፕራይዞችን ለማሳደግና ለማስፋፋት በትኩረት እንደሚሰራም ነው የጠቆሙት።

በሀገራቱ መካከል ነፃ የንግድ ስርዓት መፍጠር እንደሚያስፈልግ እና በንግድ ስርዓቱ የሚፈጠሩ እንቅፋቶችን ማስወገድ ያስፈልጋል ብለዋል።

ከዚህ ባለፈ ኢትዮጵያና ሶማሊያ በደም የሚተሳሰሩና አንድ ዓይነት ባህል፣ ቋንቋ፣ እምነት እና ታሪክን የሚጋሩ በመሆናቸው በመደጋገፍ እና በጋራ በመሆን ያሉባቸውን ችግሮች እንደሚወጡና ለዚህም በርካታ ስራዎችን መስራት እንደሚቻል ገልፀዋል።

ጉብኝታቸው በአዲስ ምዕራፍ፣ በአዲስ ግንኙነት እና ራዕይ በሀገራቱ መካከል መቀራረብን እና መተባበርን ለመፍጠር የሚያስችል እንደሆነም ገልፀዋል።

ሶማሊያም እንደ ሀገር አሁን ካለችበት ችግር በመላቀቅ የተሻለች እና የበለፀገች ሀገር እንደምትሆነም አመልክተዋል።

የሶማሊያው ፕሬዚዳንት ሙሀመድ አብዱላዚዝ ሙሀመድ በበኩላቸው ሽብርተኝነት እና የደህንነት ችግሮችን ለመከላከል ሰላም፣ ብልፅግና እና የተሻለ ኢኮኖሚያዊ ሽግግር ያስፈልጋል ብለዋል።

ከዚህ ባለፈ በሀገራቱ መካከል ኢኮኖሚያዊ ውህደት እንደሚያስፈልግ ስምምነት ላይ የተደረሰ ሲሆን፥ ለዚህም በባቡር ፣ በሀይል፣ በመንገድ እና ኢንቨስትመንት ሀገራቱን ለማስተሳሰር ውይይት እንደተካሄደ ተናግረዋል።

ፕሬዚዳንቱ ኢትዮጵያ በሶማሊያ የሚገኘውን የአልሸባብ የሽብር ቡድን ለማጥፋት በአሚሶም በኩል እያደረገች ላለች ድጋፍም ምስጋና አቅርበዋል።

እንዲሁም የጠቅላይ ሚኒስትሩ ጉብኝት የሀገራቱን ማህበራዊ እና ፓለቲካዊ ጉንኙነት እንደሚያሻሽለው እና እንደሚያሳድገው ገልፀው ኢትዮጵያ ለሶማሊያ የምታደርገውን ሁለንተናዊ ድጋፍ አጠናክራ እንድትቀጥል ጠይቀዋል።

መሪዎቹ በዚህ ውይይት አራት የባህር ወደቦችን በጋራ ለማልማት እና ነፃ የሸቀጥ ዝውውር ለመፍጠር ስምምነት ላይ ደርሰዋል።

ሀገራቱ ከዚህ በተጨማሪ መንገድን ጨምሮ በተለያዩ መሰረተ ልማቶች ለመተሳሰር እንዲቻል በትብብር ለመስራት ተስማምተዋል።ሠ

ጠቅላይ ሚኒስትር ዶክተር አብይ አህመድ በሶማሊያ ያደረጉት ይፋዊ የስራ ጉብኝት በማጠናቀቅ ወደ ኢትዮጵያ ተመልሰዋል።

 

በኤፍሬም ምትኩ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram