ስለ አባይ እንሮጣለን በሚል በተዘጋጀው ሩጫ ላይ ከግማሽ ሚሊዮን በላይ ሰዎች ይሮጣሉ

ስለ አባይ እንሮጣለን በሚል በተዘጋጀው ሩጫ ላይ ከ500 ሺህ በላይ የሚሆኑ ሰዎች እንደሚሮጡ የታላቁ የኢትዮጵያ ህዳሴ ግድብ ግንባታ ህዝባዊ ተሳትፎ አስተባባሪ ብሄራዊ ምክር ቤት ጽ/ቤት ለኢቲቪ ገለፀ፡፡

የጽህፈት ቤቱ የህዝብ ግንኙነት ሚዲያ ኮሙኒኬሽ ዳይሬክቶሬት ዳይሬክተር አቶ ሀይሉ አብረሃም ስለ አባይ እንሮጣለን በሚል ርእስ የተዘጋጀው በ100 በላይ በሚሆኑ ከተሞች የሚከናወን ሲሆን 250 ሺህ የሚሆኑት የሩጫውን ቲሸርት ለብሰው የሚሮጡ ናቸው ብለዋል፡፡ 

ግንቦት 19/2010 በተመሳሳይ ቀንና ሰዓት በሚካሄደው በዚህ ሩጫ ላይ 90 ሺህ የሚሆኑ የአዲስ አበባ ነዋሪዎችም እንደሚሮጡ አቶ ሀይሉ ገልፀዋል፡፡

ሩጫው በታላቁ ህዳሴ ግድብ ብሄራዊ አንድነታችንን የበለጠ የማጠናከር አላማ እንዳለው የተናገሩት ዳይሬክተሩ የማንንም መብት ሳንነካ በጋራ ተጠቃሚነት መርህ ወንዛችንን የመጠቀም መብት እንዳለን የማሳወቅ እንድምታም አለው ብለዋል፡፡

ይህ ሩጫ ለሶስተኛ ጊዜ የተዘጋጀ መሆኑን የገለጹት አቶ ሀይሉ በ2006 በአዲስ አበባ ከተማ በተካሄደው ሩጫ ላይ 60 ሺህ ሰዎች ተሳትፈውበታል፡፡

እንዲሁም በ2009 ዓ.ም ከ100 በላይ በሚሆኑ ከተሞች በተዘጋጀው ተመሳሳይ ሩጫ 700 ሺህ ሰዎች መሳተፋቸውን ዳይሬክተሩ አውስተዋል፡፡

ድርቤ መገርሳ

 

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram