ሳዑዲ አረቢያ ኢትዮጵያውያን እስረኞችን ለመፍታት ወሰነች

የሳዑዲ አረቢያ መንግስት በሀገሪቱ የሚገኙትን ኢትዮጵያዊያን እስረኞች ለመፍታት መወሰኑን አስታወቀ።

በሳዑዲ አረቢያ ይፋዊ የስራ ጉብኝት በማድረግ ላይ የሚገኙት የኢፌዲሪ ጠቅላይ ሚኒስትር ዶክተር አብይ አህመድ ከሳዑዲ አረቢያ አልጋ ወራሽ መሀመድ ቢን ሰልማን ጋር ተወያይተዋል።

በውይይቱ ሁለቱ ሀገሮች ትርጉም ያለው የህዝብ ለህዝብ ግንኙነት ለመፍጠር እንዲሁም በሀይል ልማት እና ግብርና ዘርፍ ያለውን ትብብር ለማጠናከር ተስማምተዋል።

ሁለቱ አገሮች ኢትዮጵያ ያለትን የቱሪዝም ሀብት ለመጠቀም እና ለማጎልበት በትብብር ለመስራት ከስምምነት እንደደረሱም ተነግሯል።

ሳዑዲ አረቢያ እና ኢትዮጵያን በኤልክትሪክ መስመር ማገናኘት በሚቻልበት ዙሪያ ጥናት ለማድርግ ከስምምነት ደርሰዋል።

በውይይቱ ወቅት አልጋ ወረሹ መሀመድ ቢን ሰልማን ኢትዮጵያ የምታደርገውን የልማት ጥረት ሳዑዲ አረቢያ እንደምትግፍ ገልፀዋል።

የሳዑዲ ባለሀብቶች በኢትዮጵያ መዋዕለ ንዋያቸውን እንዲያፈሱ እንደሚበረረቱም አልጋ ወራሹ መሀመድ ቢን ሰልማን አስታውቀዋል።

የኢፌዲሪ ጠቅላይ ሚኒስትር ዶክተር አብይ አህመድ ሳዑዲ አረቢያ ውስጥ በተለያዩ ምክንያቶች በቁጥጥር ስር ውለው በህግ ጥላ ስር የሚገኙ ኢትዮጵያውያንን የሳዑዲ አረቢያ መንግስት እንዲፈታ ጠይቀዋል።

ጠቅላይ ሚኒስትር ዶክተር አብይ ያቀረቡት ጥያቄ ተቀባይነት ማግኘቱን የውጭ ጉዳይ ሚኒስቴር ቃል አቀባይ ጽህፈት ቤት አስታውቋል።

ጠቅላይ ሚኒስትሩ በሳዑዲ አረቢያ ይፋዊ የስራ ጉብኝት ለማድረግ ትናንት ማምሻውን ነው ጅዳ የገቡት።

በሳዑዲ ጉብኝት እያደረጉ ያሉት የሀገሪቱ ንጉስ ቢን ሳልማን አብዱልአዚዝ ባደረጉላቸው ግብዣ መሰረት መሆኑንም ተነግሯል።

ኤፍ.ቢ.ሲ

Share your thoughts on this post