ሳዑዲ አረቢያ በህክምና ስህተት የአልጋ ቁራኛ ለሆነው መሀመድ አብዲላዚዝ 21 ነጥብ 7 ሚሊየን ብር ካሳ ከፈለች

በሳዑዲ አረቢያ በህክምና ስህተት የአልጋ ቁራኛ ሆና ለዓመታት የቆየው ኢትዮጵያዊው ታዳጊ መሀመድ አብዲላዚዝ 21 ነጥብ 7 ሚሊየን ብር ካሳ ተከፈለው።

ጠቅላይ ሚኒስትር ዶ/ር አብይ አህመድ በቅርቡ በሳዑዲ አረቢያ ጉብኝት ባደረጉበት ወቅት ለሳዑዲ መንግስት ያቀረቡት ጥያቄ ተቀባይነት አግኝቶ የካሳ ክፍያው መፈፀሙን የውጭ ጉዳይ ሚኒስቴር አስታውቋል፡፡

መሀመድ አብዲላዚዝ በሁለት ሳምንት ውስጥ ወደ ሀገሩ በመመለስ ህክምናውን እንዲከታተል በውጭ ጉዳይና በጤና ጥበቃ ሚኒስቴሮች አማካኝነት ዝግጅት መደረጉ ተገልጿል፡፡

ባለፈው ሳምንት በሀገሪቱ ጉብኝት ያደረጉት ጠቅላይ ሚኒስትር ዶክተር አብይ አህመድ ታዳጊ መሀመድ ያለበት ሆስፒታል በመገኘት መጎብኘታቸው ይታወሳል።

ከሀገሪቱ ልኡል አልጋ ወራሽ መሀመድ ቢን ሰልማን ጋር በተወያዩበት ወቅትም የመሃመድን ጉዳይ አንስተው የካሳ ክፍያ እንዲከፈለው ጠይቀው የነበረ ሲሆን፥ ልዑሉ አልጋ ወራሹ ይሁንታቸውን መገልፃቸውን ተከትሎ ነው የካሳ ክፍያው የተፈፀመው።

ታዳጊው መሃመድ አብዱላዚዝ ከ12 ዓመት በፊት ባጋጠመው የመተንፈሻ እክል አፍንጫው ላይ ቀዶ ህክምና ለማድረግ ነበር ወደ ጂዳ ሆስፒታል ያመራው።

በወቅቱ የ4 ዓመት ልጅ የነበረው መሃመድ ለቀዶ ህክምና ከገባ በኋላ ግን በተፈፀመ የህክምና ስህተት እስካሁን ድረስ እራሱን ስቶ የአልጋ ቁራኛ ሆኖ ቆይቷል።

የህጻኑ ወላጆችም በልጃቸው ላይ የተፈፀመውን የክህምና ስህተት ተከትሎ ለፍርድ ቤት አመልክተው የሳዑዲ ፍርድ ቤትም ለህጻኑ ካሳ እንዲያገኝ ቢወሰንለትም ለረጅም ጊዜ ሳይከፈለው ቆይቷል።

ኤፍ.ቢ.ሲ

Share your thoughts on this post