ሰሜን ኮሪያ የኒኩሌር መሞከሪያ ጣቢያዋን አፈረሰች

ሰሜን ኮሪያ በፑንግዬሪ የሚገኘውን የኒኩሌር መሞከሪያ ጣቢያ ዋሻዎችን ማፍራረሷ ተነገረ።

ሰሜን ኮሪያ የኒኩሌር መሞከሪያ ጣቢያውን ያፈራረሰችው በኮሪያ ልሳነ ምድር የነገሰውን ውጥረት ለማርገብ አስባ መሆኑም ተገልጿል።

የመሞከሪያ ጣቢያ የማፍረስ ስነ ስርዓትን ለመታዘብ ወደ ስፍራው ያቀኑ ዓለም አቀፍ ጋዜጠኞችም በአካባቢው ላይ ከፍተኛ ፍንዳታ መመልከታቸውን መስክረዋል ነው የተባለው።

ከመላው ዓለም የተውጣጡ ጋዜጠኞች ሁኔታውን እንዲታዘቡ በማድረግም ታላላቅ ፍንዳታዎች በኋላ ሶስት የመሞከሪያ ዋሻዎች እንዲፈርሱ ተደርገዋል።

መሞከሪያውን ለማፈራረስም ሁለት ታላላቅ ፍንዳታዎች ጠዋት ላይ የተደረጉ ሲሆን፥ ከሰዓት በኋላ ደግሞ አራት ፍንዳታዎች ተከናውነዋል።

የስካይ ኒውስ ጋዜጠኛው ቶም ቼሻየር የመሞከሪያ ጣቢያውን የማፈራረስ ስነ ስርዓት ለመታዘብ ከሄዱት ጋዜጠኞች ውስጥ አንዱ ነው።

ቶም ከፍንዳታው በኋላ የዋሻዎቹ በሮች በአስገራሚ መልኩ እንደተገነጠሉ እና አካባቢው በተለያዩ ገመዶች እንደተሞላ መመልከቱን ተናግሯል።

እንደ ቶም ገለጻ፥ ከተለያዩ ሀገራት የተውጣጡት ጋዜጠኞች ከስፍራው 500 ሜትር ርቀት ላይ ሆነው ማእከሉ በፍንዳታዎች ሲወድም ተመልክተዋል።

“መጀመሪያ ሶስት፣ ሁለት፣ አንድ እየተባለ ተቆጠረ፤ ቀጥሎም ከፍተኛ ፍንዳታ ነበር” ያለው ቶም፥ የፍንዳታው ድምጽ ከፍተኛ መሆኑን እና ከፍንዳታው በኋላ ከፍተኛ የአቧራ መጠን እና ሙቀት እንደበረ ገልጿል።

ፒዮንግያንግ የኒኩሌር መሞከሪያ ጣቢያውን ለመዝጋት ያሰበችው በያዝነው የፈረንጆቹ 2018 መጀመሪያ አካባቢ ሲሆን፥ አላማውም ከጎረበረቤቷ ደቡብ ኮሪያ እና ከአሜሪካ ጋር ያላትን ግንኙነት መልሳ ለማደስ መሆኑም ይታወቃል።

ሰሜን ኮሪያ የኒኩሌር መሙከሪያውን ዛሬ አፈረሰችው ቢባልም የተመራማሪዎች ቡድን ግን የመሞከሪያ ጣቢያው በፈረንጆቹ ካለፈው መስከረም 2017 ወዲህ በከፊል እንደወደመ ያምናሉ።

መሞከሪያውን የማፈራረስ ስራው ላይም ገለልተኛ ዓለም አቀፍ የታዛቢዎች ቡድን እንዳይገኙ መደረጉም ተነግሯል።

ምንጭ፦ ቢቢሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram