ራሰ በራነትን የሚፈውስ አዲስ መድሃኑት አግኝተናል- ተመራማሪዎች

ራሰ በራነትን ለማከም የሚያስችል አዲስ መድሃኒት ማግኘት መቻላቸውን ተመራማሪዎች ገለፁ።

አንደ ተመራማሪዎቹ ገለጻ፥ አዲሱ የራሰ በራነት መከላከያ መድሃኒት ከዚህ ቀደም የአጥንት በሽታ የሆነውን “ኦስቴዮፕሮሲስ” ለማከም ጥቅም ላይ ሲውል ከነበረ መድሃኒት ነው የተገኘው።

በብሪታንያ የተሰራው ጥናት መሪ ዶክተር ናታን ሀዋስኪ፥ አዲስ የተገኘው መድሃኒት በተለይ በራሰ በራነት ለሚጠቁ ሰዎች አዲስ እና መልካም ዜናን ይዞ የመጣ ነው ብለዋል።

በአሁኑ ወቅት ራሰ በራነትን ለመከላከል የሚጠቅሙ ሁለት አይነት መድሃኒቶች ብቻ ገበያ ላይ ያሉ ሲሆን፥ መድሃኒቶቹ ለሁሉም ሰዎች እኩል ውጤታማ መሆን አልቻለም።
ከዚህ በተጨማሪም መድሃኒቶቹ ራሰ በራነትን ከመከላከል በዘለለ በሰዎች ላይ የሚያስከትሉት የጎንዮሽ ጉዳት ያመዝናል ነው የተባለው።

ስለዚህ በርካታ ራሰ በራ ሰዎች መድሃኒቶችን ከመጠቀም ይለቅ የፀጉር ንቅለ ተከላ ቀዶ ህክምና ማድረግን በአማራጭነት እየተጠቀሙ መሆኑም ነው የሚነገረው።

ታዲያ ተመራማሪዎች አዲስ አገኘን ባሉት የጥናት ውጤት ራሰ በራነትን ከመከላከል አንፃር ፋይዳው የጎላ መሆኑን ነው የሚናገሩት።

በአዲሱ መድሃኒት ላይም በቤተ ሙከራ ደረጃ 40 ራሰ በራ ወንዶች እንዲቀቡት በማድረግ ሙከራ ማድረጋቸውን የሚናገሩት ተመራማሪዎቹ፥ ይህም ውጤታማ ሆኗል ባይ ናቸው።

የጥናቱ መሪ ዶክተር ናታን ሀዋስኪ፥ ጥናቱ ውጤታማነቱ ቢረጋገጥም አሁንም ቢሆን መድሃኒቱ በሰዎች ላይ ሊኖረው በሚችለው የጎንዮሽ ጉዳት ዙሪያ ሙከራዎች ይቀራሉ ነው ያሉት።

የብሪታኒያ የቆዳ ሀኪሞች ማህበር ቃል አቀባይ በበኩላቸው፥ ጥናቱ በጣም ደስ የሚል እና መልካም ነግርን ይዞ የመጣ ነው ብለዋል።

ሆኖም ግን መድሃኒቱ ሰዎች ዘንድ ቀርቦ ጥቅም ላይ ከመዋሉ በፊት በርካታ ጥናቶች ተደጋግመው ሊካሄዱበት ይገባል ሲሉም ተናግረዋል።

ምንጭ፦ ቢቢሲ

Share your thoughts on this post