ምን ያህሎቻችን ስለ ‹ይባብ ቤተመንግስት› እናውቃለን?

የአማራ ክልል ደራስያን ማህበርና የክልሉ ባህልና ቱሪዝም ቢሮ በይልማና ዴንሳ ወረዳ ደብረ ማይ ቀበሌ የሚገኘውን ይባብ ቤተመነግስት ጎብኝተዋል።
ይባብ ቤተ መንግስት በ17ኛው ክፍለ ዘመን መጀመርያ ላይ በአፄ ሱስንዮስ እንደተመሰረተ ታሪክ ያስረዳል።

ቤተ መንግስቱ ከደንቀዝ ቤተ መንግስት ቀጥሎ ከጎንደር ቤተመንግስት ቀደም ብሎ የታነፀ ነው። በኢትዮጵያ ቀደምት ነገስታት ታላላቅ ጉባኤዎች ተካሂዶበታል።
ደም አፋሳሽ ጦርነቶችንም እንዳስተናገደ በታሪክ ሰፍሮ ይገኛል።
ከ1863-1871 እቴጌ ጣይቱ ከእናታቸው ከወይዘሮ የውብዳር እና ከእንጀራ አባታቸው አለቃ ኃይሉ ገርም ኑረውበታል።

ዳግማዊ አፄ ሚኒሊክ በ1868 ዓ.ም ወደ ቤተመንግስቱ መጥተው ከእቴጌ ጣይቱ ጋር ለመጀመርያ ጊዜ በአካል ተገናኝተው የተወያዩበትም ጭምር ነው። ታድያ ይህ ባለብዙ ታሪክ ባለቤት የሆነው ቤተመንግስት አለቃ ኃይሉ እንግዳ ያሰሩት ቤተ ክርስትያንን ጨምሮ ቤተመንግስቱ ፈራርሶ ቅሪቱ ብቻ ቀርቷል።

ቤተ መንግስቱ በአከባቢው ነዋሪዎቸ ይዞታ ስር ሲሆን መሬቱም ለእርሻ አገልግሎት እየዋለ ይገኛል። የአከባቢው ህብረተሰብ ከግንዛቤ እጥረት የተነሳ ለቤተ መንግስቱ ተገቢውን እንክብካቤ አለማድረጉን ተናግረዋል።

ተጨማሪ ጥፋት እንዳይደርስበት አሁን ባለበት ሁኔታ ታሪካዊ ቦታው ተከልሎ ጥበቃ እንዲደረግለት ሲሉ ለአማራ ክልል ባህልና ቱሪዝም ቢሮ ደብዳቤ እንዳስገቡ ይናገራሉ።
የአማራ ክልል ደራስያን ማህበር ሊቀመንበር ሊቀ ህሩያን በላይ መኮነን ቤተ መንግስቱን የመታደግ ስራ የዘገየ መሆኑን ተናግረው አሁንም ቢሆን የቤተ መንግስቱ ቀደምት ቅርፅ መልሶ መገንባት ይቻላል ብለዋል።

የአማራ ክልል ባህልና ቱሪዝም ቢሮ ምክትል ኃላፊ አቶ ልዑል ዩሃንስ የቀደመ የቤተ መንግስቱ ቅርፅ ይዘት ምን ይመስል እንደነበረ ለማወቅ ጥናት እንደሚያደርጉ ተናግረው መልሰው መገንባት የሚቻልበትን መንገድ ጠቁመዋል።

ዘጋቢ፡- ሀረገወይን ታደሰ – አብመድ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram