መፈናቀል ለምን?

መፈናቀል ለምን?

መፈናቀል ለምን?  | ስናፍቅሽ አዲስ በድሬቲዩብ

አንድ ሀገር ዛሬ ዜጎቿ የትም ሰርተው መኖር ካልቻሉባት፤ ትናንት የሺ ዓመት ስልጣኔ ቢኖራት ምኗ ነው? ያፈሩትን ጥሪት ጥለው እንዲሄዱ የሚገፉ ኢትዮጵያውያንን ማን ይታደጋቸው፤ ከካማሺ እስከ ባህር ዳር

ኢትዮጵያ ብትታደስ ባትታደስ መለስ ሞቶ አብይ ቢነሳ ሃይለማርያም ለቆ እከሌ ቢቀጥል ከዜና ያለፈ ዜጋውን እፎይ ያስባለ ለውጥ አላየንም፡፡

ጣሊያንን ያባረሩት ንጉሥ ከፋሽሽት ብሰው መጡ፡፡ ዜጎች በመደብ ተገፉ፡፡ መሬታቸው ተነጠቀ፡፡ ህግ ለሰለሞናውያን የተቀቡ ብቻ የምትቆም ቁስ ሆነች፡፡ ወታደሩም ቢሆን ቀን ሰጥቶት ስልጣን ቢይዝ እፎይ ያለ ደሃ የለም፡፡ ስልጣንም ጥሪትም ብርቁ የሆነ ዶማ ቤተ መንግስት ሲገባ የሞተው የደሃ ልጅ ነው፡፡

ወታደር ጨረሰኝ ያለው ነጻ አውጪ ጫካ ገብቶ ባባረረው ወታደር በተተካ ማግስት አሁንም የደሃ ልጅ መሞቱን ቀጠለ፡፡ የቄሮ ጩኽት የፋኖ ማስፈራራት የደሃን ልጅ ከሞት አልታደገም፡፡

ኢትዮጵያዊ በሀገሩ ሰርቶ መኖር ብርቅ ሊሆንበት ነው፡፡ በዘሩ ይገፋል፤ በዘሩ ይባረራል፡፡ የደከመበት ጥሪት ይነጠቃል፡፡ ትልቋ ሀገር ኢትዮጵያ የየሰፈሩ ርስት ሆናለች፡፡

አሁንም በብሔር ሳቢያ መባረሩ እንደ በደኖው ዘመን ነው፡፡ እንደ አርባጉጉ ነው፡፡ ምክንያቱ አልተዋጋነውም፡፡ የየራሳችን ብሔር ሲነካ ብቻ ነው የምንጮኽው፤ ይህ ደግሞ ለሰው በላ ካድሬዎች ተመችቷል፡፡ ከየትም ሰው ሲባረር ካድሬው ተነክቶ አያውቅም፡፡ ድሃው ሲሰደድ አብረን ልንጮህ ሲገባ ዘሩን ፈትሽን የእኛ አይደለም እንላለን፡፡

ከካሚሺ ዞን የተባረሩት ኢትዮጵያውያን ባህር ዳር ወድቀዋል፡፡ ይህ የሆነው ከዚህ በኋላ አማራ በብሔሩ ምክንያት አይበደለም፤ አይሰደድም ብለው ከጥልቅ ተሃድሶ ማግስት የብአዴኑ መሪ ደመቀ መኮንን መግለጫ በሰጡ ማግስት ነው፡፡

ይህ የሆነው ማንም ኢትዮጵያ የትም ሰርቶ ለመኖር ዋስትና ይኖረዋል ብለው ዶክተር አብይ መቀሌ በተናገሩ ማግስት ነው፡፡

እንደ ሶርያ ባልፈረሰች ሀገር እንደ ሶርያውያን የሚሰደዱ ዜጎቻችንን አየን፡፡ ለምን? እንደልቡ የሚኖር ዜጋ ያልፈጠረች ሀገር ሙሉ ስሟ ኢትዮጵያ ተብሎ ተጠራ አልተጠራ ጥቅሙ ምንድን ነው?

ኢትዮጵያዊውን የምትገፋ ኢትዮጵያ የማን ሀገር ናት? ልብ ይሰብራል፡፡ ትምህርታቸውን አቋርጠው የሚሰደዱ ህጻናት ከብሔራቸው ይልቅ ሰው መሆናቸው የገዘፈ የዓለም ጌጥ ናቸው፡፡ እስከመቼ በሀገራችን ምድር ይህ የለመድነው ዜና ይሆናል? DireTube

Share your thoughts on this post