fbpx

ለጠቅላይ ሚኒስትሩ ድጋፍ በወጡ ላይ የፖሊስ መኪና የነዳው ግለሰብ ታስሮ ጊዜ ቀጠሮ ተጠየቀበት

ታምሩ ጽጌ – ሪፖርተር

ለጠቅላይ ሚኒስትር ዓብይ አህመድ (ዶ/ር) ድጋፍና ምሥጋና መስቀል አደባባይ ሰኔ 16 ቀን 2010 ዓ.ም. በወጣው ሕዝብ ላይ፣ ይዞት የነበረውን ላንድክሩዘር የፖሊስ መኪና ሆን ብሎ በመንዳት ጉዳት አድርሷል ተብሎ የተጠረጠረው ግለሰብ ፍርድ ቤት ቀርቦ ጊዜ ቀጠሮ ተጠየቀበት፡፡

 

የሰሌዳ ቁጥሩ ኮድ ፖሊስ 0384 (ኢት) የሆነ የፖሊስ መኪና ያሽከረክር ነበር የተባለው ተጠርጣሪ ዋና ኢንስፔክተር ሮብሶ ዋዩ መሐመድ ነው፡፡ ካሜራ የሚቀርፁ ባለሙያዎችን ጭኖ መስቀል አደባባይ ከደረሰ በኋላ፣ ባለሙያዎቹን አውርዶ በቆመበት አካባቢ በፈነዳው ቦምብ የተጎዱ ዜጎችን ወደ ሕክምና ቦታዎች እንዲወስዳቸው ሲጠየቅ ፈቃደኛ ካለመሆኑም በተጨማሪ፣ ለድጋፍ ሠልፉ በወጡ ሰዎች መሀል ማሽከርከሩንና ብዙዎችን ገጭቶ ጉዳት ማድረሱን፣ የፌዴራል ፖሊስ ወንጀል ምርመራ ቢሮ የወንጀል ምርመራ ቡድን ተከሳሹን በፌዴራል ከፍተኛ ፍርድ ቤት ሁለተኛ ወንጀል ችሎት አቅርቦ አስረድቷል፡፡

 

ተጠርጣሪው በሰዎች ላይ ጉዳት ከማድረሱም በተጨማሪ መኪናውን፣ የቪዲዮ መቅረጫ ካሜራና ሌሎች ዘመናዊ መሣሪያዎችን ጨምሮ ግምቱ 1,128,275 ብር ዋጋ ያለው ንብረት እንዲወድምና እንዲሰረቅ ማድረጉን መርማሪ ቡድኑ  አስረድቷል፡፡

 

መርማሪ ቡድኑ የ18 ምስክሮችንና የአንድ ተጎጂ ቃል መቀበሉን፣ የቪዲዮ ማስረጃዎችንና የመኪና ቃጠሎ ምርመራና መሰብሰቡንና መቀበሉን ገልጿል፡፡ ተጨማሪ የሰውና የቪዲዮ ማስረጃዎችን ማሰባሰብና የምስክሮችን ቃል መቀበል እንደሚቀረው፣ የፎረንሲክ ምርመራና የተጎጂዎችን የሆስፒታል ምርመራ ውጤት መቀበል እንደሚቀረውና ሌሎች ማስረጃዎችን እንደሚያሰባስብ ገልጾ፣ ለተጨማሪ ምርመራ 14 ቀናት እንዲፈቀድለት ለፍርድ ቤቱ አመልክቷል፡፡

 

ተጠርጣሪው በበኩሉ ለፍርድ ቤቱ እንዳመለከተው፣ መርማሪ ቡድኑ የሚፈልገውን ምርመራ ወስዶ መጨረሱንና በዋስ ቢለቀቅ የሚያጠፋውም ሆነ የሚያስፈራራው ነገር ስለሌለ የዋስትና መብቱ እንዲከበርለት ጠይቋል፡፡

 

የግራ ቀኙን ክርክር የሰማው ፍርድ ቤቱ የተጠርጣሪውን የዋስትና ጥያቄ ውድቅ በማድረግ፣ መርማሪ ቡድኑ ከጠየቀው 14 ቀናት ውስጥ 10 ቀናት በመፍቀድ ለሐምሌ 9 ቀን 2010 ዓ.ም. ቀጠሮ ሰጥቷል፡፡

Share your thoughts on this post
%d bloggers like this:
Visit Us On TwitterVisit Us On YoutubeVisit Us On Instagram