ሁለት የካናዳ ባንኮች የመረጃ መረብ በርባሪዎች ጥቃት ኢላማ ሆነዋል

በካናዳ ሁለት ትልልቅ ባንኮች በመረጃ መረብ በርባሪዎች መመታታቸውን ገለጹ።

በሃገሪቱ አራተኛ እና አምስተኛ የሆኑት የሞንትሪያል ባንክ እና የካናዳ ንግድ ባንኮች ወደ 90 ሺህ የሚደርሱ ደንበኞቻቸው መረጃ ሳይበረበር እንዳልቀረ ገልጸዋል።

የሞንትሪያል ባንክ ካሉት 8 ሚሊየን ደንበኞች መካከል እስከ 50 ሺህ የሚደርሱት ደንበኞቹ መረጃ ሳይበረበር እንዳልቀረ አስታውቋል።

ባንኩ የደንበኞቸ መረጃ ተበርብሯል ከማለት ውጭ ግን የደረሰውን የጉዳት መጠንና የተዘረፈ የገንዘብ መጠን አልገለጸም።

አሁን ላይም መረጃ በርባሪዎቹ የደንበኞችን መረጃዎች ይፋ ከማድረጋቸው በፊት ጉዳዩን እልባት ለመስጠት እየሰራሁ ነው ብሏል።

የካናዳ ንግድ ባንክ በበኩሉ መረጃ በርባሪዎች የ40 ሺህ ደንበኞችን ግላዊ መረጃዎችና አካውንት ላይ ጥቃት አድርሰናል ማለታቸውን ነው የገለጸው።

ባንኩ ከጉዳዩ ጋር በተያያዘ ተፈጽሟል የተባለው ጥቃት እስካሁን ባያረጋግጥም ጉዳዩን በቅርበት እየተከታተለው መሆኑን ገልጿል።

በሳምንቱ መጨረሻ ተፈጽሟል ከተባለው የመረጃ መረብ ብርበራ ጋር በተያያዘም፥ የሁለቱ ባንኮች የአክሲዮን ድርሻ ማሽቆልቆሉም ነው የተነገረው።

አሁን ላይም ሁለቱ ባንኮች ደንበኞቻቸው አካውንታቸውን በአግባቡ እንዲቆጣጠሩና አጠራጣሪ ነገር ሲመለከቱም እንዲያሳውቁም ጠይቀዋል።

ባለፈው ወር የካናዳ ባንኮች በመረጃ መረብ ብርበራ እንደሚጋለጡ ሲነገር መቆየቱ የሚታወስ ነው።

በባንኮች ላይ የሚፈጸም የመረጃ መረብ ብርበራ አሁን አሁን የተለመደ ሆኗል።

ባለፈው አመት በተለያዩ ሃገራት በሚገኙ ባንኮች የግለሰቦች አድራሻዎችን ጨምሮ በሚሊየን ዶላሮች የሚቆጠር ገንዘብ በዚህ ሳቢያ ለጥቃት መዳረጉን መረጃዎች ያመላክታሉ።

 

ምንጭ፦ ሬውተርስ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram