fbpx

ሁለቱ ሲኖዶሶች በይፋ የአንድነትና ትውወቅ ስነ ስርዓት አካሄዱ

በሁለቱ ሲኖዶች መካከል የተፈጠረውን እርቀ ሰላም ተከትሎ ሁለቱ ሲኖዶሶች በይፋ የአንድነትና ትውወቅ ስነ ስርዓት አካሄዱ።

የአንድነትና ትውወቅ ስነ ስርዓቱን የኢትዮጵያ ኦርቶዶክስ ተዋህዶ ቤተ ክርስቲያን ፓትሪያርክ ብጹዕወቅዱስ አቡነ ማቲያስ በፀሎት አስጀምረውታል።

በዚህ ወቅትም አቡነ ማቲያስ፥ ሁለቱ ሲኖዶሶች እርቅ ፈፅመዉ ከ26 ዓመት በኋላ ለመጀመሪያ ጊዜ ለጉባኤ በጋራ መገናኘታቸው የፈጠረባቸውን ደስታ ገልፀዋል።

አቡነ ማቲያስ አክለውም፥ ባለፉት ዓመታት በሁለቱ ሲኖዶሶች መለያየት የተነሳ ሀገሪቱ ያጣችውን አንድነትና ፍቅር በጋራ ፀሎት እና ስራ ህዝቡንና ቤተ-ክርስቲያኗን ልንክስ ይገባል ብለዋል።

ፋና ብሮድካስቲንግ ኮርፖሬት ያነጋገራቸው ከውጭ የተመለሱ ብፁአን አባቶችም በእርቁ መፈፀም የተሰማቸወዩን ደስታና ከእንግዲህ አንድ በመሆን ምእመኑን ለማገልገል መዘጋጀታቸውን ገልፀዋል።

የአንድነትና ትውወቅ ስነ ስርዓቱ ላይም ብፁዕን አባቶች በጋራ ፎቶ የመነሳት ስነ ስርዓት አካሂደዋል።

ባለፉት 26 ዓመታት ለሁለት ተከፍለው የሀገር ቤትና የውጭ ሲኖዶስ እየተባለ ሲጠሩ የነበሩት ሁለቱ ሲኖዶሶች ቃለ ውግዘታቸውን አንስተው ሰሞኑን ወደ ዕርቅ መምጣታቸው ይታወሳል፡፡

ዕርቀ ሰላሙን ተከትሎ አራተኛው የኢትዮጵያ ኦርቶዶክስ ተዋህዶ ቤተክርስቲያን ፓትርያርክ ብፁዕ ወቅዱስ አቡነ መርቆርዮስ እና ብፁአን አባቶች ባሳለፍነው ረቡዕ አዲስ አበባ መግባታቸው ይታወሳል።

ለብፁዕ ወቅዱስ አቡነ መርቆሬዎስ ከቦሌ አለም አቀፍ አውሮፕላን ማረፊያ ጀምሮ እስከ መንበረ ፀባኦት ቅድስት ስላሴ ካቴድራል ድረስ የቤተ ክርስቲያኗን ቀኖና በጠበቀ መልኩ የአቀባበል ስነ ስርዓት ተከናውኗል።

የሀገር ውስጡ ቅዱስ ሲኖዶስ በውጭ ሲኖዶስ ላይ አሳልፏቸው የነበሩ የ1984፣ 1985 እና 1999 ዓመተ ምህረት ውግዘቶችን ማንሳቱ የሚታወስ ነው።

በተመሳሳይ በውጭ ሀገር የሚገኘው ሲኖዶስ ከዚህ ቀደም በሀገር ውስጥ በሚገኘው ሲኖዶስ ላይ አሳልፏቸው የነበሩ ቃለ ውግዘቶችን ባለፈው ሳምንት ማንሳቱ ይታወቃል።

ከዚህ በኋላ የኢትዮጵያ ኦርቶዶክስ ተዋህዶ ቤተክርስቲያን በአንድ የቅዱስ ሲኖዶስ አመራር እንድትመራ መወሰኑም ይታወሳል።

በስምምነቱ መሰረትም ሁለቱ ቅዱሳን ፓትርያርኮች በሕይወት እስካሉ ድረስ ቤተ ክርስቲያቲያኗን በእኩልነት የአባትነት ክብራቸውን ጠብቃ እንደምትይዝ ተነግሯል።

በነገው እለትም በሚሊኒየም አዳራሽ ጠቅላይ ሚኒስትሩን ጨምሮ የተለያዩ ሀገራት አምባሳደሮች፣ ምዕመናን በጥቅሉ ከ30 ሺህ ሰው በላይ በሚገኝበት ሁለተኛው የዕርቀ ሰላም ፕሮግራም ይዘጋጃል።

Share your thoughts on this post
%d bloggers like this:
Visit Us On TwitterVisit Us On YoutubeVisit Us On Instagram